طالوت

سوال یہ ہے کہ ۔ ۔ ۔

2009-07-14T00:53:00.006+03:00

دلچسپ و حیرت انگیز امر ہے کہ ہم صبح و شام اسلام کی حقانیت و اطمینانیت کا اظہارکرتے ہیں اور بضد ہیں کہ اسلام ہی دراصل اکلوتا اور سچا مذہب ہے ، جس نے اشرف المخلوقات انسان کو اس کی انسانیت کی اس منزل پر پہنچا یا جہاں پہنچنے کا وہ حق رکھتا ہے، مگر ہمارا عمل ہرگز اس نظریہ کی تائیدنہیں کرتا جس کا صبح و شام اظہار کرتے ہماری زبانیں نہیں سوکھتیں ۔
اسلام جس نے عالم انسانیت سے ناانصافی کو ختم کرنے کا بیڑا اٹھایا اور مساوات انسانی کو اولین اہمیت دی کہ جس کی رو سے کسی گورے کو کالے پر ، کسی کالے کو گورے پر ، کسی عرب کو عجم پر ، کسی عجم کو عرب پر کوئی فوقیت حاصل نہیں ، مگر اس نظریے کے پیروؤں کی مجموعی حالت یہ ہے کہ وہ حسب نسب ، ذات قبیلے ، زبان و ملک کی بنا پر اپنے سینوں پر یوں فخر سے ہاتھ مارتے ہیں کہ گویا یہ سبق نہ انھوں نے کبھی پڑھا نہ کبھی اس کی تبلیغ کی جیسے یہ کسی اور ہی مخلوق کی کسی غیر معروف زبان کے نہ سمجھ میں آنے والی محض آڑھی ترچھی لکیریں ہوں۔ گروہ در گروہ ، قبیلہ در قبیلہ ، محسوس و غیر محسوس انداز میں ہم عربوں اور دیگر اقوام کے اسی جاہلانہ دور کی عکاسی کرتے ہیں جس کو احمد رسول اللہ چشم زدن میں ختم کر چکے اور ان کے عظیم ساتھیوں نے سالوں تک اس کو قائم و دائم رکھا۔ آج ہمارے لیے فخر محض اس بات میں ہے کہ ہم کس خطہ زمین سے تعلق رکھتے ہیں ، کس زبان کے وارث ہیں ، کس خاندان کے چشم و چراغ ہیں یا کس قدر مال و دولت اور اختیارات رکھتے ہیں ۔ جب کہ اسلام کی حقیقت ؟ کہ محسن انسانیت اپنے اصحاب میں اس طرح بیٹھتے کہ کوئی پہچان نہ سکتا تھا کہ افراد میں قوم کے سردار اور خاتم النبین بھی تشرف فرما ہیں ۔عمر بن خطاب جن کی ٹھوکروں میں قیصر و کسرٰی کی عظیم سلطنتیں تھیں ، ایک حبشی غلام کو "میرے سرداربلال" کہہ کر پکارتے تھے ۔ کیا دنیا کوئی ایک مثال بھی پیش کر سکتی ہے کہ نوکر اونٹ پر بیٹھا ہو اور سردار اونٹ کی مہار پکڑے چلا آتا ہو ؟ کیا ہمارے تفاخر کے یہ قصے جھوٹے ہیں ؟ یا ہم ہی ان کے اہل نہیں ؟ یا پھر ہم منافقین و فاسقین ہیں ؟ کیا سید ، علوی ، فاطمی ، قریشی ، عباسی ، جاٹ، راجپوت، خان، رئیسانی ، قائم خانی، مغل، سولنگی، جوکھیو، مروت، آفریدی ، نقوی،رضوی، ہونا ہمارے لیے کسی طور بھی قابل فخر ہو سکتا ہے ؟ماسوائے اس کے کہ فقط ہماری پہچان کا سبب ہوں ۔ کیا ابو جہل کا گورا رنگ اسے جنت کی رنگینیاں دے سکتا ہے ؟ کیا بلال حبشی کو کالے رنگ کےباعث جہنم کی آگ چھو سکتی ہے ؟

ہم حسب نسب کے بیماروں کے لیے علامہ تمنہ عمادی نے کیا خوب تسلی فراہم کی ہے ۔ جناب محمود عباسی کی کتاب تحقیق سید و سادات کے پیش لفظ میں رقمطراز ہیں

" نسب کی حیثیت سہاگہ کی ہے ۔ ایمان صحیح و حسن عمل اصل سونا ہے ۔ نسبی شرافت اگر ایمان صحیح و حسن عمل کے ساتھ ہو تو سونے پر سہاگہ ہے ۔ جس کے پاس ایمان صحیح و حسن عمل تو ہے مگر نسبی شرافت نہیں ہے تو اس کے پاس سونا تو ہے سہاگہ نہ ہوا ، نہ ہو مگر جس کے پاس ایمان صحیح و حسن عمل ہی نہیں وہ اگر نبی زادہ بھی ہو تو صرف سہاگہ رکھ کر اس پر کیا نازکر سکتا ہے ؟ قران مجید میں کہیں بھی نسلی نسبت کو نہ ذریعہ نجات بتایا ہے نہ عنداللہ موجب عزت و شرف ۔ سارا فضل و شرف اور ساری عزت و کرامت ایمان صحیح و عمل صالح پر ہی موقوف ہے ۔"

یہ حسب نسب کا ہی جرثومہ ہے جو اکثر اوقات ہمیں کسی چیز کی حقیقت کی خبر ہونے کے باوجود اس پر آمادہ نہیں کرتی کہ ہمارے آباء ایسا نہ کرتے تھے۔ بے شمار قوموں قبیلوں میں کمتری و برتری کی بنیاد پر بٹی امت مسلمہ جس میں پنڈت اور شودر کی تقسیم مزید گہری ہو رہی ہے اور طرہ یہ کہ اس کو مزید گہرا کرنے والے سب سے بڑے عنصر دولت کی غیر منصافانہ تقسیم امت کی مزید زبوح حالی کا سبب تو بن سکتی ہے مگر ان حالات میں خیر کی امید رکھنا دیوانے پن کے سوا کچھ نہیں ۔ حکمران طبقے جو مذہب ، معاشرت ، اقتصادیت اور اختیارات کے حوالے سے آپس کے اعلانیہ و غیر اعلانیہ گٹھ جوڑ سے عام مسلم کے ساتھ تفریق روا رکھ رہے ہیں اس خلیج کا نتیجہ کسی زبردست سونامی کی صورت میں تو برآمد ہو سکتا ہے جو سب کچھ بہا کر ہمیں نئے سرے سے کچھ ترتیب دینے کا موقع تو فراہم کر دے شاید مگر اسلامی فلاح کا وہ نظریہ پھر بھی پورا نہ ہو سکے گا جس کی بشارتیں دی گئی ہیں ۔ الہامی علم کو اپنے مطلب و مقصد کی تاویلوں اور سوچ کی جامدیت ہمیں جس تباہی کے دہانے کی طرف دھکیل رہی ہے اس پر صرف غور فکر کی ہی ضرورت نہیں بلکہ جدو جہد کی بھی اشد ضرورت ہے اور آج کے موجودہ سائینسی ترقی میں یہ بات اور بھی خطرناک ہو جاتی ہے جبکہ دنیا کو کئی بار تباہ کرنے کے لائق بارود کے ڈھیر پہلے سے ہی موجود ہیں ۔ ان خلیجوں کو پاٹ کر اگر انسانی مساوات کی اصل روح کو ان جسموں میں داخل نہ کیا گیا تو یقنا قیامت ہمارے ہی ہاتھوں بپا ہو گی جو شاید وقت سے پہلے ہو اورضرورت سے زیادہ دردناک ۔ آج بھی باوجود اس کے کہ ہم بہت سے معاملات کو بخوبی سمجھتے ہیں اور ہمارے ایمان و عقائد میں بھی شامل ہیں مگر ہمارے رویے انتہائی خرابی پر ہیں ۔ ہم اس عظیم خبر کی مزید نفی کے قابل نہیں ہیں جو قران میں بڑی صراحت کے ساتھ دی گئی ۔

و کان الناس امۃ واحدہ (البقرہ)

اور سب انسان ایک ہی امت ہیں

فنجن بنو الاسلام واللہ واحد وا ولی عباداللہ باللہ من شکر

ہم اسلام کے فرزند ہیں اوراللہ سب کا ایک ہے اللہ کے بندوں میں اولٰی وہی ہے جو اللہ کا شکر گزار ہے

تو سوال یہ ہے کہ ہم کہاں کھڑے ہیں اور ہمیں کہاں ہونا چاہیے ؟

حرف آغاز

2009-07-04T23:18:00.002+03:00

بعض احباب اصرار کرتے ہیں کہ "اِن دنوں" مگر میرا کہنا ہے کہ "اُن دنوں" ، وہ ذرا زور دے کر کہتے ہیں کہ اِن دنوں اور میں جنجھلاہٹ کے عالم میں چیختاہوں کہ اُن دنوں ، آہستہ آہستہ یہ زور اور جنجھلاہٹ غصے اور بیزاری میں بدل جاتا ہے اور دونوں طرف کا موقف وہی رہتا ہے ، اس میں ذرا بھی تبدیلی واقع نہیں ہوتی اور بالاآخر طرفین ناک بھوں چڑھا کر چپ سادھ لیتے ہیں۔ چند روز گزرے کہ پھر سے یہی سلسلہ شروع ہو جاتا ہے اور اسی طرح اختتام پذیر بھی ۔ اس سارے عمل میں جو اچھی چیز ہے وہ یہ کہ اس سے نا صرف دونوں اطراف ، قوت برداشت میں اضافہ ہوتا چلا جاتا ہے بلکہ ہر نئے "اِن اور اُن" کے بعد کچھ نہ کچھ ایسا ضرور ہوتا ہے کہ جس پر یا تو اتفاق ہو چکا ہوتا ہے یا پھر اسے کسی قدر سمجھا جا چکا ہوتا ہے ۔ دونوں ہی صورتیں بہتری کی طرف لے جاتیں ہیں اسلئے یہ انتہائی ضروری ہے کہ یہ سلسلہ چلتا رہے ، کہیں نہ رکے ۔ میں چاہتا ہوں کہ آپ بے شک میرے نظریات سے اتفاق نہ کریں اور نہ میں آپ کے نظریات سے ، بے شکل ہم انھیں قابل عمل نہ جانیں ، قابل قدر نہ سمجھیں مگر کم از کم مجھے اور آپ کو انھیں پیش کرنے کا حق تو ضرور ہی ہونا چاہیے۔ بحیثیت انسان تو یہ سب کا بنیادی حق ہے ۔ ہمارے یہاں ان دنوں جمہوریت و اظہار رائے آزادی کا بڑا چرچا ہے ۔ جسے دیکھئے ، جس سے ملئے وہ اسی کی بات کرتا نظر آئے گا ، مگر مقام افسوس یہ ہے کہ وہ اپنے لئے تو یہ حق چاہتا ہے مگر دوسرے کو نہیں دیتا ۔ وہ برداشت ہی نہیں کر سکتا کہ کوئی اس کے نظریات وخیالات کے علاوہ کچھ کہے ، اس کی سوچ کو چیلنج کرے ، اس کے عقیدے کے علاوہ کوئی عقیدہ پیش بھی کرے ۔ قوت برداشت خصوصا ایسے حالات میں کہ جب ہر ایک قبلہ الگ ہر ایک سوچ مختلف اور ہر ایک عقیدہ دوسرے کے مخالف ہو انتہائی ضروری ہے ۔ خصوصا مذہبی معاملات میں تو اس کی ضرورت اسلئے بھی بڑھ جاتی ہے کہ مذہب کے معاملے میں کوئی بھی شخص چاہے وہ جدت پسند روشن خیال ہو یا قدامت پرست بہرحال دونوں ہی ایک خاص درجے میں انتہا پسند ہوتے ہیں اور اسی کے سبب طاقتور کمزور پر غلبہ حاصل کرنے کی کوشش کرتا ہے جس کے نتیجہ میں فساد لازم ہو جاتا ہے ۔ اس کی مثالوں سے یہ دنیا بھری پڑی ہے ، جیسے دہشت گردی میں ایک تخصیص بزور قوت و پراپگینڈا اسلامی دہشت گردی کی کر دی گئی ہے بلکہ اگر یہ کہوں کہ اب دہشت گرد کا دوسرا نام ہی مسلم رکھ دیا گیا تو بےجا نہ ہو گا ، اور یہ سرا سر انتہا پسندی پر مبنی سوچ ہے اسی طرح اہل اسلام میں بھی دو انتہا پسند قوتیں موجود ہیں ، ایک وہ جو اندرون خانہ اور بیرونے خانہ دونوں مقامات پر انتہا پسندی کا شکار ہیں اور دوسرے وہ جن کے یہاں معاملات میں ساری گڑ بڑی ان دونوں محاذوں پر ڈٹی قوت کے باعث ہے ۔ قوت برداشت کو پیدا کیجئے اور دوسروں کو بھی اس پر اکسائیے ، کہ لڑنے جھگڑنے اور منہ پھیر لینے سے معاملات حل نہیں ہوں گے ۔ کسی کے غصے پر مسکرائیے ، بات کو رفع دفع کیجئے ، اپنی غلطی کو تسلیم کیجئے ، ہٹ دھرمی اور ضد سے پرہیز کیجئے ، اگر آپ مطمئن نہ ہوں تو مخالف سے سمجھنے کا وقت لیجئے یا بات چیت کو لپیٹتے ہوئے مزید گفتگو کے لئے معذرت کر لیجئے ، چاہے کچھ بھی ہو اخلاقیات کا دامن ہاتھ سے نہ جانے دیجئے ۔ کیونکہ بہرحال یہ حضرت انسان ہے اور اس میں آپ کوئی چیز ٹھونس نہیں سکتے لہذا پتھر پر بار بار گرنے والا پانی کا قطرہ بننے کی کوشش کیجئے نہ کہ لوہار کا ہتھوڑا ۔

اس لمبی چوڑی تمہید کا مقصد یہ ہے کہ چونکہ مجھے بھی بلاگ کا پیٹ بھرنا اور اپنی بھڑاس نکالنا ہے اور اپنی سمجھ بوجھ کے مطابق کسی معاملے پر اظہار خیال کرنے سے نہ تو میں شرماتا ہوں اور نہ گھبراتا ہوں ، لگی لپٹی کے بغیر کچھ بھی کہہ دینا میری عادت ہے خصوصا لکھنے کے معاملے میں ۔ اسلئے ممکن ہے میری تحریریں بہت سے لوگوں کو ناگوار گزریں مگر میں یہ واضح کر دینا چاہوں گا کہ شدید مخالفت کے باوجود میری کوشش ہوتی ہے کہ اخلاقیات کا دامن ہاتھ سے جانے نہ دوں اور ایسی ہی توقع میں اپنے معزز مبصرین سے کرتا ہوں کہ ناشائستہ کلمات ، ذاتیات سے الجھنا اور دھمکیاں دینا نہ تو مجھے پسند ہے اور نہ اس طرح کی حماقتیں وصول کرنے پر میں اپنی حرکتوں سے کبھی باز آیا ہوں نہ آؤں گا۔ تاہم یہ واضح کرتا چلوں کے اگر کچھ احباب کے نزدیک کسی معاملے سے پردہ اٹھانا یاکسی کے نظریات کی خوبی و خامیوں پر بات کرنے جیسے معاملات کو اگر وہ غیر اخلاقی یا متعصبانہ رویہ سمجھتے ہیں تو یقینا ان کو اپنی اس رائے سے رجوع کرنا چاہیے۔ تنقید مجھے بے حد پسند ہے بشرطیکہ تعمیری ہو۔ میں اگرچہ کچھ اچھا لکھنے والا نہیں ہوں کہ اچھا لکھنے کے لئے اچھا پڑھنا انتہائی ضروری ہے اور ان دنوں میں اس نعمت سے محروم ہوں اور اس کے ساتھ ساتھ اچھے مشاہدے کی بھی ضرورت ہوتی ہے جو تقریبا یہاں مفقود ہے ۔ اور یوں بھی لکھنے کے لئے مجھے خود پر ایک مخصوص موڈ طاری کرنا پڑتا ہے اور اسے طاری کرنا اور قائم رکھنا اسلئے بھی مشکل ہے کہ میرے ہم کمرہ حضرات متضاد دلچسپیوں کے حامل ہیں اور ایسے میں کسی نقطہ پر مرتکز ہو کر کچھ کرنا خاصا دشوار ہوتا ہے ۔ بلاگ لکھنےکے سلسلے میں ، میں ان تمام حضرات کا شکر گزار ہوں جن کا کسی بھی قسم کا کردار اردو یونیکوڈ اور بلاگنگ سے متعلقہ معاملات میں ہے ۔ مگر اس سلسلے میں خصوصا میں نبیل کا انتہائی مشکور جن کی محنت کا پھل مجھے بھی کھانے کا موقع مل رہا ہے ۔ اردو محفل کے روح رواں نبیل اور ان کے دیگر ساتھی جو انتہائی جانفشانی سے کسی نہ کسی حوالے سے اردو کے انٹرنیٹ پر فروغ میں بغیر کسی لالچ و فائدے کے کردار ادا کر رہے ہیں یقیناً قابل تحسین و ستائش ہیں ورنہ ہمارے ہاں علم کو جس طرح دولت کی بھینٹ چڑھا دیا گیا ہے ان حالات میں یہ احباب واقعتا عظیم لوگ ہیں۔ ان کے اردو اور اردو کے شیدائیوں پر یہ احسانات ہمیشہ یاد رکھے جائیں گے ۔ دوسرے جناب زین زیڈ ایف ہیں جنھوں نے میری ناک میں دم کر دیا ہے کہ بلاگ لکھو بلاگ لکھو ، ان کے اصرار پر مجھے حوصلہ ہوا کہ ہم بھی کچھ ہاتھ پاؤں مار کے دیکھتے ہیں کیا خبر کچھ اچھا نتیجہ ہی نکلے مگر بطور سزا میں سوچ رہا ہوں کہ زین کو پابند کیا جائے کہ وہ روزانہ ایک چکر اس بلاگ کا لگایا کریں ۔ تیسرے جناب علی ذاکر ہیں جن کی دلچسپی اور توجہ سے میری انٹر نیٹ تک رسائی آسان ہو گئی ہے ۔ اس کے علاوہ ون اردو اور دیگر اردو بیٹھکوں کا بھی مشکور ہوں کہ جنھوں نے میری دلچسپی ان بیٹھکوں میں بڑھائی ۔ اور اس میں سب سے عمدہ کردار اردو محفل کا ہے اور یقینا جب کبھی میں اردو محفل کا ذکر کرتا ہوں یا میرے ذہن میں اس کا خیال آتا ہے تو اس میں اردو محفل کے ایک ایک رکن جن سے میں تھوڑی بہت بھی واقفیت رکھتا ہوں ان کا احسان مند ہوتا ہوں کہ ان کی دلچسپی اور لگن سے اردو محفل پر جھمگٹا رہتا ہے اور ہم آزادی اور اطمینان سے اپنے اپنے خیالات دوسروں تک پہنچاتے ہیں ان پر دلیلں دی جاتی ہیں کانٹ چھانٹ کی جاتی سنوارا جاتا ہے اور اصل میں یہ ساراعمل کسی تحریر کے ساتھ نہیں بلکہ ایک شخصیت کے ساتھ ہو رہا ہوتا ہے ۔ اسلئے میں ان بیٹھکوں اور چوپالوں کو صدقہ جاریہ سمجھتا ہوں ۔ اللہ رب العزت ان بیٹھکوں کو دن دگنی رات چگنی ترقی دے اور وہ تمام کوششیں بار آور ہوں جن کے لئے ان بیٹھکوں کا قیام عمل میں لایا گیا ہے ۔

فی الحال تو میں بلاگ کی ترتیبات کو جاننے کی کوشش کر رہا ہوں کہ کیسے اور کس طرح مواد بلاگ پر رکھا جاتا ہے اور کس طرح اس میں تبدیلی وغیرہ کی جاتی ہے ۔ جیسے جیسے مہارت بڑھتی جائے گی انشاء اللہ تحریروں میں بھی اضافہ ہو تا چلا جائے گا۔ کہ دماغ بوڑھا ہو گیا ہے اور اب کسی نئی چیز کو سمجھنے میں ذرا وقت لگتا ہے ۔ اب صرف دوسرے بلاگرز سے گپ شپ بڑھانا باقی ہے تاکہ جان پہچان ہو اس علاقے میں ۔ یہ میری تحریر ایک طرح سے آزمائشی تحریر بھی ہے اسی سے میں بلاگ کی ترتیبات سمجھنے کی کوشش کروں گا اور پھر اردو محفل کے جاندار و شاندار محفلین تو ہیں ہی ۔ انشاء اللہ
وسلام